ഇന്നലെ യയലത്തെ ആണ്ടി മരിച്ചുപോയ്
ചാക്കാല ചൊല്ലണ്ടെ യാരു പോവും?
നല്ല സമറായനായി ഞെളിയുവാന്നല്ല സമയമി-തത്ര തന്നെ!
ചാത്തന്റെ സൈക്കിള് കടം വാങ്ങി
ദു:ഖത്തിന് മാറാല മോത്തു ചാര്ത്തി
പരോപകാരമിഥം ശരീരമെന്നു സ്വയം കരുതി
രാവിലെ തന്നെ ഞാന് യാത്രയായി
വാഹനമൊന്നുമേയില്ല നിരത്തില്
ഹാ യെത്ര സുഖമീ സൈക്കിള് യാത്ര!
തൊണ്ട വരണ്ടപ്പോളിറ്റു ജലത്തിനായ്
കൊച്ചു കടകളും കാണ്മതില്ല!!
മുന്നിലതാ ഘോരഘോരം ചിലക്കുന്നൊരാള്ക്കൂട്ടം
ഓ! ജാഥ!!!
കൂട്ടത്തിലൊരു ചെറു ബാല്യന്
ചിരിയോടെ വന്നെന്റെ സൈക്കിളിന് കാറ്റുമഴിച്ചു വിട്ടു!!
പിന്നെ കഴുത്തില് പിടിച്ചു ഞെരിച്ചിട്ടു
ചൊല്ലി അറിഞ്ഞില്ലെ യിന്നു ഹര്ത്താല്!!
ആര്ത്തനായ് താന്തനായന്തിനേരത്തൊടെ
യാണ്ടി തന് വീട്ടില് തളര്ന്നിരുന്നു!!
ആരേ പ്രതീക്ഷിക്കാന്?ശവദാഹം നടക്കട്ടെ,
ഉള്ളവര് മാത്രം കരഞ്ഞിടട്ടെ!!
ശവമഞ്ചം മെല്ലെ യെടുക്കവെ
കൂട്ടമായെത്തി കുറെപ്പേര്
ഓ! ആണ്ടിക്കുമെത്ര മിത്രങ്ങള്!!
വന്നവര് ശവമഞ്ചം ബലമായ് തടഞ്ഞു
ഇന്നു ശവദാഹം നടത്തുവാന്പാടില്ലറിഞ്ഞില്ലേ
യിന്നു ഹര്ത്താല്!!!
സുന്ദര കേരളം വെല്ക!!
ഹര്ത്താലേ നമ: